stutt fréttainnskot

Sumarfrís vikan alveg að taka enda, ótrúlegt hvað hún var fljót að líða. Flest verkefnin sem voru á listanum góða búin :) Það sem er nú best af öllu að allir hafa verið hressir þessa vikuna, ójá get svo svarið það.
Við erum að fara í sveitina á morgun, kusurnar að fara út í fyrsta skipti þetta vorið og spennandi að sjá hvernig Unnur Lilja bregst við þeim hamagangi. Síðan auðvitað árlegt kvennahlaup/ganga og kökuát á laugardaginn mmmmmmmmmmmmmmmmmm. Ljúft. Gestur og Grjetar Andri rifu pallinn um síðustu helgi, hann var grautfúinn, svo sem ekki skrýtið þar sem fyllt hefur verið upp með möl upp að gólfi svo engin loftun hefur verið. Ég er ennþá að safna kjarki og orku til að moka í hjólbörur og smella mölinni kerruna. Held það sé dáldið mikið verk, skrýtið að það gerist ekki bara að sjálfu sér!!!!! Það verður voða huggulegt að fá síðan nýjan pall til að sóla sig á........

allir frískir hér á bæ

Það sem helst telst fréttnæmt af okkur er að engin er veikur!!!!!! 7,9,13 bank, bank :) Við erum heima á Íslandinu góða Unnur Lilja og Gestur voru ennþá svo slöpp þegar við áttum flug út að ákveðið var samkvæmt læknisráði að halda sér heima. Húsfrúin er nú samt í sumarfríi þessa vikuna og mikil plön í gangi en spurningin er síðan hvort þeim er framfylgt :) Vorum að koma heim úr sveitinni þar sem helsta verk okkar var að setja niður hæla þar sem væntanlegt sumarhús okkar á að standa. Unnur Lilja hefur mikin áhuga á dýralífinu í sveitinni, biður um að fá að fara í fjós og fjárhús ótal sinnum á degi hverjum. Við kíktum í Oddsholt á föstudaginn síðasta til að athuga hvort eitthvað hefði skemmst við jarðskjálftann, allt í orden þar. Gaman að skutlast austur fyrir fjall og sjá þessi risabjörg sem féllu úr Ingólfsfjalli. hefði nú hreint ekki haft áhuga á að vera þar á ferð á meðan þau þutu niður úr fjallinu. Auður Salka varð síðan 1 árs á laugardaginn og fórum við í dýrindisafmælisboð þar á bæ. Kristjana hélt hins vegar upp á afmælið sitt með því að fara í kvennareið með Skuggakerlingum í Borgarnesi. Um næstu helgi er svo kvennahlaup og kökuboð hjá Helgu og svo aðstoða Kristjönu í fermingarveislu sem hún tók að sér að græja mat í. Alltaf nóg að gera...

smá fréttir

langt síðan Gyða Sól hefur skrifað :) en af henni og hennar familý er allt fínt að frétta. Við erum búin að fara nokkuð margar helgar í sveitina svona eins og vera ber. Ætluðum nú um helgina í sauðburðarstúss en húsfrúin er veik. Kom heim veik úr vinnunni í gær og er handónýt núna með hita og kvef, fæ alltaf vorkvef svo þetta er allt "eðlilegt". Við skötuhjú erum búin að fara niður í fjöru á fjórhjólum núna síðustu tvö skipti sem við höfum verið fyrir vestan og Gestur heldur því fram að ég hafi gert tilraun til að losa mig við hann með því að reyna að drekkja honum...... ræðum það ekki meira hérna.
En ég ætla að smella inn hérna einni uppskrift fyrir Steinu Báru frænku

Vínarbrauð

500-550 gr hveiti
1 pakki (11,8) gr þurrger
100 gr sykur
1/2 tsk möndludropar
1 egg
150 gr brætt smjörlíki
2 dl volgt vatn

aðferð eins og venjulegt gerdeig, látið hefast og allt það

fylling
125 gr smjör
175 gr sykur
100 gr marsipan

smjörið brætt og öðru hrært út í.

deigið er í ca 4 lengjur, eftir endilangri lengjunni er hæfilegu magni af fyllingu smurt og gjarnan smá súkkulaði rúsinum eða möndluflögum. Lokað þannig að ekkert leki út. Bakað í ca 15 mín við 200°

geggjað sætt og gott

í fréttum er þetta helst

Við Gestur gerðumst ansi menningarleg í síðustu viku og fórum á tónleikana með Andrea Bocelli í Egilshöll. Tónleikarnir voru æðislegir í einu orði sagt, gæsahúð og alles birtist þegar kappinn söng "time to say good bye" ó mæ gúdddnesss hvað það var yfirgengilega flott. Væri alveg til í að fara á tónleika hjá honum á Ítalíu. Eina vesenið var að koma sér á staðinn og heim aftur. Tók 45 mín að keyra úr Engihjallanum að Egilshöll og ca 60 mín aftur heim eftir tónleikana. Undarlegt hvað svona viðburðir þurfa að vera dýrir, við vorum svo nísk að keyptum okkur bara í c svæðið. Þar kostaði stk tæpar 13 þús...... já Íslendingar að græða á Íslendingum.
Við Unnur Lilja fórum svo með pabba/afa í sveitina á föstudag, afskaplega ljúft. Gestur var svo heppinn að honum var boðið á tónleika með Baggalút í Salnum í Kópavogi. Hann hefur lítið rætt annað en hve þetta var frábært. Baggalútur er náttúrulega bara snilld. Gestur kom svo vestur á laugardagskvöld. Unnur Lilja dýrasjúka var alveg í essinu sínu í sveitinni, ræddi málin heilmikið við Mirru sem að sjálfsögðu hlustaði af mikilli athygli. Þær eru nú jafnaldrar svo þær hljóta að skilja hvor aðra mjög vel. Að sjálfsögðu fór Unnur Lilja í fjósið, stóð nú ekki alveg á sama þegar hún sá allar þessar stóru kusur. Það leið nú fljótt hjá og mesta sportið var að fá að pota aðeins í þær og sjá hvort þær hreyfðu sig. Fór aðeins á bak á eina en leist nú ekki alveg á það!!!! Ekkert smeyk við gibburnar. Væri örugglega ekkert mál að gera hana að ekta sveitakerlu.
Annars er fátt merkilegt að gerast hjá okkur. Ég var að koma heim frá því að halda fyrirlestur um "aðlögun að breyttum aðstæðum" fyrir hóp vefjargigtarkvenna á fræðslunámskeiði hjá GÍ. Læt hafa mig út í svona verkefni ca x2 á ári. Dauðfegin að þetta er að baki í ár!!! En jæja best að reyna að svæfa Unni Lilju, hún nebbblilega vaknaði þegar ég kom heim.
Góða nóttina

summary

Við Unnur Lilja fórum að Skiphyl um helgina og skyldum Gest eftir heima. Greyið átti að fara í próf á laugardag sem hann síðan komst ekki í vegna slæmrar augnheilsu. Hann er búin að vera að berjast við ótal sár á hornhimu beggja augna + sýkingu í öðru auga svo ekki var próflestur gáfulegur kostur í þeirri stöðu. Hann átti því bara "náðuga" helgi án kvenna sinna.
Á Skiphyl var hins vegar líf og fjör eins og gjarnan er. Sirrý og Steina Bára frænkur okkar komu með barnaskara í sveitaferð, eins og gefur að skilja var spennan mikil hjá börnunum, svo komu Gummi Baddi og Fannar líka. 10 stk börn á aldrinum 7 mánaða til 13 ára. Veit ekki betur en að allir hafi skemmt sér konunglega um helgina. Brjálað að gera hjá Mirru litlu, hún var ekki alveg viss í hvern af fjórum fótum væri nú best að stíga í og á hvern að hlusta, gleymdi stundum að hlusta á mömmu sína :) svona eins og börnum hættir til. Hún var svo þreytt eftir helgina að hún svaf nánast allan mánudaginn.
Unnur er búin að vera hálfstúrinn það sem af er þessari viku, með hitavellu og nefrennsli. Þar kom að því, hún hefur ekki orðið veik síðan hún var tveggja vikna. Æfing fyrir foreldra hennar áður en hún fer til dagmömmunar í haust. Við ætluðum að fara í sommerhallen í Grímsnesinu í kvöld og vera þar á morgun, koma heim annað kvöld. Hættum við útaf þessum slappleika. Stefnum að Skiphylsferð um helgina, ef heilsufar okkar mæðgna leyfir. Held að ég sé að fá einhverja pest líka. Ætlum að fara með hestana okkar vestur og sleppa þeim í stóðið.
5 ára afmælið að baki, ljómandi fínn dagur það. Ansi margir í ættinni sem eiga afmæli í maí enda besti mánuður ársins :)

flakk og flandur

skruppum örstutta ferð í sumarbústaðinn í Grímsnesinu áðan. Tengdó var búin að vera þar í ró og næði og hafa það huggulegt og við gerðumst friðarspillar :) Gestur náði að setja vatnið á, eitthvað sem er búið að vera vandamál, frekar óþægilegt að vera vatnslaus. Bara vesen að vera með vatn í fötum og flöskum. Fórum líka bílasölurúnt, mér til lítillar ánægju og Unni til enn minni ánægju. En raunveruleikinn er nú samt sá að við þurfum að skipta um bíl, spurning hvenær við höfum okkur í það samt. Ekkert liggur á, núverandi bíll er ennþá í heilulagi, er það ekki bara nóg????
Fór á Etac kynningu í Gerðubergi í dag. Skemmtilegasti hluti þeirrar kynningar var að hitta Söndru og Elísu. Lærði svosem ýmislegt en sá engar nýungar í smá hjálpartækjum sem ég er að sækja um fyrir gigtarsjúllana sem ég er að þjálfa. Samt sem áður hollt og gott að fylgjast með hvað er að gerast.
Við Unnur Lilja ætlum í sveitaferð um helgina, ég þarf bráðnauðsynlega að fá smá sauðburðsfíling.
Fyrir nokkrum vikum fengum við pípulagningamann frá ónefndu fyrirtæki til að tengja handklæðaofn fyrir okkur. Eitthvað hefur kappinn sá verið með viljugan penna því reikningurinn sem við fengum var upp á tæp 77.000 .- jebbbbbb okkur leið eins og við hefðum verið rænd. Við kvörtuðum undan þessari vitleysu og endursendum reikninginn og heimtuðum endurskoðun. Meðal annars vorum við rukkuð um 2 klst sem vinna við að skoða verkið, hann var í ca 30 mín, eitthvað hefur penninn greinilega runnið til. Síðan voru skrifaðir 9 klst í vinnu við að tengja ofninn og 1 klst í verkstjórn!!! Hann var hjá okkur frá 10-12 og síðan frá 13-15, hvernig hægt er að fá í heild 12 klst út úr því skil ég bara ekki. Enda hef ég alltaf verið léleg í reikningi. Og hverjum var hann að verkstýra??? Kannski hann klofin persónuleiki og það hefur verið brjáluð vinna við að verkstýra þeim öllum, mar spyr sig. Ég svo sem skil ekki heldur afhverju við erum rukkuð fyrir leigu á pressuvél sem hann notaði, finnst það bara eiga að vera hluti af vélbúnaði og ekki að rukkast sérstaklega. Skil það sem svo að ef við fengjum smið til að vinna fyrir okkur, þyrftum við þá að borga fyrir leigu á hamri????? Núna erum við búin að fá nýjan reikning sem er 25 þús krónum lægri, sem er samt of hátt en við ætlum að láta þetta yfir okkur ganga og njóta þess að eiga heit og notaleg handklæði og hugsa "hlýlega" til píparans.
Tuði kvöldsins lokið hér með og ég farin að sofa....