til umhugsunar

Íslensk kona hefur verið að styrkja námsmann í Uganda sem "óvænt varð á
vegi hennar" eins og hún orðaði það. Hann var búinn að lofa að senda
henni einkunnirnar sínar sem hann og gerði þegar þar að kom. Þar kom
fram að hann hafði fengið A í öllum fögum og góða umsögn að auki. Það
var nefnilega búið að gera honum ljóst að góður árangur væri lykillinn
að því að hann fengi áframhaldandi styrk.

En allt er breytingum undirorpið í henni veröld og ýmislegt getur
vissulega haft áhrif á afkomu Frónbúans og getu hans til að láta gott af
sér leiða. Hún var að velta því fyrir sér hvort rétt væri að reyna að
segja honum frá gangi mála hér á landi, þ.e. kreppunni og öllu því. Og
það gæti því miður reynst nauðsynlegt að skera eitthvað niður styrkinn
vegna hins breytta ástands hérna megin. Það eru nefnilega tiltölulega
litlar líkur á því að fréttir af Íslenska skipbrotinu hafi borist alla
leið til hans þarna í Entebbe. Og svo er alls ekki víst að hann skilji
alvöru málsins á sama hátt og við hér heima. En ef reynt væri að útskýra
hið Íslenska kreppuástand fyrir honum sem virðist ætla að fara langt með
að sliga þjóðina einhver þó nokkur ár inn í framtíðina, gæti það samtal
orðið á eftirfarandi nótum.



*Heyrðu félagi, það er úr vöndu að ráða. Íslenska þjóðin er gjaldþrota!

Hvað segirðu, en leiðinlegt að heyra, eigið þið þá ekki fyrir baunum og
maís?

*Jú reyndar eru búðir fullar af mat og enginn vöruskortur.

Hvað segirðu, þið eigið þá mat. Það er gott. En eigið þiðþá ekki þak
yfir höfuðið lengur!

*Jú við eigum reyndar íbúð eins og flestir og það eru fáir
heimilislausir á Íslandi.

En hvað segirðu mér þá? Gengur plága yfir landið, eru allir veikir og
heilbrigðiskerfið lamað?

*Nei nei reyndar ekki, við fáum nánast ókeypis læknaþjónustu og erum með
ágætt heilbrigðiskerfi.

Nú jæja. Það var gott að heyra. En eru þá skólarnir að loka og fá
kannski ekki allir tækifæri til að læra að lesa lengur og sérstaklega þá
ekki konur.

*Jú reyndar er 99,9% læsi á Íslandi og menntakerfið er ágætt, margir með
háskólagráður og konur ekki síður en karlar.

Það er nú gott, en þið verðið þá að passa er að lenda ekki í stríði við
nágrannaþjóðir ykkar.

*Uuuu við erum reyndar ekki með her og teljumst nú frekar friðsæl þjóð.
En við þurfum bara að hlusta á bullið og stríðsyfirlýsingarnar í fíflinu
honum Gordon Brown. Það er það sem við munum líklega komst næst því að
fara í stríð.

Ok. Segðu mér nú samt ekki að þið komist ekki í hreint vatn.

*Við eigum reyndar besta vatn í heimi.

Nú, er vegakerfið þá ónýtt? Hérna í Afríku ganga allir eða nota asna og
stundum reiðhjól. Það eru líka til strætisvagnar hérna, en þeir eru
alltaf yfirfullir.

Eru kannski strætóarnir hjá ykkur hættir að ganga?

*Neeee... Það er verið að ræða um hvort almenningssamgöngur hér eigi að
vera ókeypis, en það eru flestallir vegir malbikaðir og næstum allir eru
á nýlegum bílum.

Eigið þið þá enga peninga til að gera ykkur glaðan dag? Ég meina, þú
sagðir að þjóðin væri gjaldþrota.

*Flestir eiga reyndar einhvern sparnað á bókum þó sumir hafi tapað honum
eða hluta hans síðustu daga. Það verður alla vega erfitt að kaupa stærri
flatskjái og utanlandsferðunum verður að fækka.

Já, ég á kannski einhvern tíma eftir að fara til útlanda, en ég er nú
líka frá Uganda. Hefur kannski enginn vinnu og þurfið þið núna öll að
betla?

*Neiiij...! Atvinnuleysið er um 2% en við verðum að flytja Pólverjana
aftur heim og fara sjálf að vinna vinnuna sem þeir unnu.

Hmmm... Svo þið hafið peninga, mat, húsaskjól, heilbrigðiskerfi,
menntakerfi, búið við frið, eigið nóg hreint vatn og samgöngur eru
góðar.

Segðu mér, hvert var vandamálið aftur?



Eftir þessar vangaveltur um aðstæður okkar hérna uppi á skerinu og þetta
ímyndaða samtal, ákvað hún að vera ekki að íþyngja honum með ræfilslegum
áhyggjum sínum af "gjaldþrota" eyríki norður í ballarhafi. Námsgjöld
hans skulu greidd hér eftir sem hingað til og kannski fær hann líka smá
vasapening með. Hann getur þá kannski tekið strætó í skólann endrum og
sinnum í stað þess að þurfa ganga í marga klukkutíma eins og venjulega.
Fé hins meinta íslenska terrorista yrði þá líklega bara vel varið.

Unnur Lilja orðin 2ja ára

þá er heimasætan orðin 2ja ára!!!!!! merkilegt hvað tíminn líður hratt. Þessi elska hefur afskaplega ákveðnar skoðanir á hlutunum og er mjög sjálfstæð. Í flestum tilvikum er nú samt hægt að tala hana til en ekki er hægt að beita mútum. Við héldum hérna ljómandi fínt afmælisboð fyrir hana síðasta laugardag.
Sunnudaginn sl ætluðum við Gestur til Barcelona í 5 daga en vegna óstöðugs gengis þá ákváðum við að hætta við ferðina út og fórum í staðinn í sumarbústað í Brekkuskógi. Byrjar bæði á B, næstum því eins ha? en alla vega þá fórum við á sunnudagskvöld og komum heim seinnipartinn í dag þriðjudag. Unnur Lilja var heima með ömmu Dóru og skemmtu þær sér konunglega. Við höfðum það huggulegt, Gestur vann og vann og ég gerði ekki neitt nema sofa, sauma bútasaum og horfa á Grey´s Anatomy :) voða næs hjá mér. Náði nú að trufla vinnuna aðeins hjá honum og fá hann til að setjast í heitapottinn með mér og slappa af. Þetta er í fyrsta skiptið síðan við Gestur fórum að búa sem við förum tvö ein í sumarbústað, kominn tími til.

fréttir

Réttirnar þetta árið voru mjög blautar en að sjálfsögðu skemmtilegar eins og alltaf. Einkennisklæðnaðurinn var pollagalli og stígvél. Heimtur voru þokkalegar hjá Fjárbúinu á Skiphyl. Unnur Lilja var eins og skriðdreki í réttunum og ekki vitund hrædd við kindurnar.
Síðan þá hefur verið nóg að brasa eins og alltaf hjá okkur. Svandís og Elmar búin að eignast lítinn prins og hefur amman og langamman ekki þurft að nota skó eða sokka síðan því þær svífa amk 20 cm yfir jörðu. Hrafn búin að eiga stórafmæli og bjóða í fantafína veislu, takk fyrir okkur. Eiríkur fluttur til okkar og því miður flytur hann fljótlega frá okkur aftur. Afskaplega ánægjulegt að hafa hann hjá okkur. Unnur Lilja fyrst núna eftir ca mánuð að þora að tala við hann og fá hann til að leika við sig.
Við smelltum okkur í leikhús í síðustu viku, fórum að sjá Fló á skinni í Borgarleikhúsinu. Mæli eindregið með því, allir í leikhús!!!!! Buðum með okkur kerfisstjóra stærsta viðskiptavinar DCC og hans frú. Eini gallinn á ferðinni já og stór galli var það var RÖNG timasetning á miðunum okkar. Hef aldrei lent i svona veseni áður. Á miðunum stóð skýrt og greinilega 20:30 og við mættum kl 20:20 og nema hvað ..... engin í miðasölunni og fannst okkur það skrítið og engin að bíða eftir að hleypt verði inn í salinn. Þá byrjaði sýningin sumsé kl 20:00!!!!!!!!! upphófst nú rekistefna um hvort við ættum að drífa okkur inn eða að fá miða seinna. Við ákváðum bara að drífa okkur því það voru víst bara 15 mín búnar af leikritinu. Fengum einhverja harða og óþægilega stóla (sennilega í refsingarskyni heheheh) við endan á röðinni. Fengum síðan sætin okkar í hléi. Meira vesenið. Mistökin með miðana var hjá www.midi.is þeir höfðu sett rangan tíma. Borgarleikhúsið og midi.is vísuðu á hvort annað en á endanum fengum við gjafakort á sýningu að eigin vali. Sem er bara fínt. ójá þannig var nú það.
Nú styttist óðfluga í að heimasætan verði 2ja ára. Stórskrýtið!!!! orðaforði hennar eykst dag frá degi. Dásamlegt að fylgjast með henni sitja einhversstaðar og syngja, því oftast kann hún ekki nema orð og orð úr hverju lagi fyrir sig og útkoman er frábær. Sem dæmi má nefna afi búa = afi minn og amma mín út á Bakka búa, kaggar = Allir krakkar, allir krakkar, heta ói = hesta jói.